AMAF - Təlim bazalar

«Kür» Olimpiya İdman Mərkəzi

Hələ keçmiş Sovet İttifaqı dövründə uzun axtarış və tədqiqatlardan sonra SSRİ yığmasının təlim-məşq bazası məhz Mingəçevir şəhərində Kür çayının sahilində salınmışdı. Bura bütün göstəriciləri və iqlim şəraiti ilə qış dövründə məşq prosesi üçün əlverişli məkan idi. Məhz buna görə həmin məkanda Olimpiya məşq bazası inşa olundu. Amma əfsuslar olsun ki, məlum hadisələr – Ermənistanın ölkəmizə təcavüzü ilə əlaqədar doğma yurd-yuvalarından didərgin düşmüş vətəndaşlarımızın bir qismi bazada yerləşdirildi. Bundan sonra tədricən avarçəkmə bazası dağıntı vəziyyətinə düşməyə başladı. Ötən il cənab prezident İlham Əliyev həmin ərazidə yeni bazanın inşasına dair sərəncam imzaladı. Prezidentimizin müdrikliyi onda oldu ki, bu bazanın bərpasına yox, müasir tələblərə cavab vermək şərtilə yenisinin tikilməsi ilə bağlı göstəriş verdi. Gənclər və İdman Nazirliyi bazadan çəkilişlər apardı və tender elan edərək, xarici şirkətlərə təqdim etdi. Tender nəticəsində qalib gələn xarici şirkətə bazanın tikintisi həvalə olundu. Artıq tikinti işlərinə başlanılıb və 2008-ci ilin sonları – 2009-cu ilin əvvəllərində baza hazır vəziyyətdə olacaq. Baza daxilində beş bina – 130 nəfərlik otel, 50 metr uzunluqda Olimpiya standartlarına uyğun 200 tamaşaçı tutumuna malik hovuz, qayıqların saxlanması və təmiri üçün qaraj, inzibati bina, voleybol, boks, güləş və digər növlərlə məşğul olanlar üçün 500 nəfərlik tribunaya malik idman zalı fəaliyyət göstərəcək. Həmçinin, baza daxilində hakimlər üçün qüllə, üç açıq tennis kortu, jurnalistlər üçün yer və kafe nəzərdə tutulub.

Hərbi Dəniz Qüvvələri İdman Klubu nəzdində Bakı avarçəkmə bazası

Bakı şəhərinin 2 milyondan çox əhalisinin su idman növlərinə, o cümlədən avarçəkməyə olan marağını nəzərə alaraq, Hərbi Dəniz Qüvvələrinə məxsus idman klubunun nəzdində Azərbaycan Milli Avarçəkmə Federasiyasının müvəqqəti ofisi tikildi. Layihə seçilərkən Mingəçevir Olimpiya avarçəkmə bazasında olduğu kimi, arxitektura ansamblına daxil olan kompleks məsələlər – ərazinin ölçüsü, landşaftı, bağ-park ansamlı, inkişaf perspektivi və s. də nəzərə alındı. Layihə yeni arxitektura elementlərinə malik mehmanxana kompleksi ilə seçilir. Bura Hərbi Dəniz Qüvvələrinin bazasında avarçəkənlərlə yanaşı, həm də vaterpolçu, üzgüçü və sinxron üzgüçülərin öz texnikalarını nümayiş etdirmələrindən ötrü 50 metr uzunluğuna malik hovuz da daxildir. Habelə, inzibati bina və arxasında kompleks trenajorlardan ibarət örtülü zalda fəaliyyət göstərəcək. Örtülü zalda həm də basketbol, voleybol, boks, güləş və cüdo ilə məşğul olmaq mümkündür. Onun yanında futbol meydançası və kort da yerləşir. Yenə qayıqlar üçün qaraj, qadın və kişilər üçün paltardəyişmə, duş otaqları, trenajor zalı, qayıqların dənizə çıxması üçün körpücük, 200 nəfərlik tribuna hazırlandı.